लोकशाही भारत न्यूज नेटवर्क
सातारा : मुख्यमंत्री युवा कार्य प्रशिक्षण योजना अर्थात लाडका भाऊ योजना अंतर्गत गत विधानसभा निवडणुकीपूर्वी माजी मुख्यमंत्री एकनाथ शिंदे यांनी युवकांसाठी ही योजना जाहीर केली होती. या योजनेतून राज्यभरातील एक लाख 34 हजार युवक-युवतींना प्रशिक्षण देण्यात आले. सातारा जिल्ह्यातील सुमारे साडेतीन ते चार हजार प्रशिक्षणार्थींनी यात सहभाग घेतला होता.
सुरुवातीला सहा महिन्यांचे प्रशिक्षण देण्यात आले असून, नंतर पाच महिन्यांची मुदतवाढ देण्यात आली. एकूण अकरा महिन्यांचा प्रशिक्षणकाल पूर्ण झाला असला तरी, प्रशिक्षणानंतर रोजगार मिळाला नाही. उलट सर्व प्रशिक्षणार्थींना शासकीय आस्थापनांतून कार्यमुक्त करण्यात येत आहे. त्यामुळे प्रशिक्षणार्थ्यांमध्ये नाराजीचे वातावरण असून, राज्यभर ठिकठिकाणी आंदोलन आणि उपोषण सुरू झाले आहे.
याच पार्श्वभूमीवर सातारा जिल्ह्यातील प्रशिक्षणार्थ्यांनी सातारा लोकसभा मतदारसंघाचे खासदार श्रीमंत छत्रपती उदयनराजे भोसले महाराज साहेब यांची भेट घेऊन निवेदन सादर केले. या भेटीच्या वेळी माननीय सौ. श्रीमंत दमयंती राजे उदयनराजे भोसले महाराणी साहेब उपस्थित होत्या.
प्रशिक्षणार्थ्यांच्या प्रमुख मागण्या :
१) शासकीय आस्थापनांमध्ये कायमस्वरूपी रोजगार उपलब्ध करून द्यावा.
२) नियमित वेळेवर विद्यावेतन देण्यात यावे व रोजगारानंतर पगार मिळावा.
३) चार ते पाच महिन्यांचे थकित विद्यावेतन तातडीने देण्यात यावे.
निवेदन देताना सातारा जिल्ह्यातील सर्व तालुक्यांतील प्रशिक्षणार्थी उपस्थित होते. सातारा जिल्हा प्रतिनिधी हिना पानसरे, कराड तालुका अश्विनी माने, जावली तालुका सुप्रिया पाडळे, पाटण तालुका माधव देशपांडे, फलटण तालुका आकाश गोळे, वाई तालुका प्रथमेश अमराळे, महाबळेश्वर तालुका रेखा खामकर, मान तालुका प्रशांत भोसले, कोरेगाव तालुका रेशमा नलवडे, खंडाळा तालुका करिष्मा बनकर आणि खटाव तालुका विष्णू काळे उपस्थित होते.
