सगुणमाता कन्स्ट्रक्शन रौप्यमहोत्सवी वर्षांच्या उत्कृष्ट कार्याची श्रीमंत संजीवराजेंकडून प्रशंसा

फलटण – सगुणमाता कन्स्ट्रक्शनच्या रौप्यमहोत्सवी कार्यक्रमाचा भव्य सोहळा अनंत मंगल कार्यालयात पार पडला. या प्रसंगी श्रीमंत संजीवराजे ना. निंबाळकर यांनी सगुणमाता कन्स्ट्रक्शनच्या पंचवीस वर्षांच्या उल्लेखनीय कामगिरीचे कौतुक करत, “सगुणमाता कन्स्ट्रक्शनने फलटण ते ताथवडा घाटापर्यंतचा रस्ता ज्या दर्जाने उभारला, तो आजही उत्तम स्थितीत आहे. हीच त्यांच्या कार्याची खरी ओळख आणि शुभेच्छा आहेत,” असे गौरवोद्गार काढले.

कार्यक्रमाला डॉ. पार्श्वनाथ गुंगा, नितीन भैया भोसले, ज्येष्ठ पत्रकार अरविंदभाई मेहता, राजीव नाईक निंबाळकर, व्ही.एस. जाधव, नेहा जोशी, सडेकर साहेब, दत्ताशेठ देसाई, विक्रम झांझुरणे, रणधीर भोईटे, सिकंदर डांगे, किरण दंडीले, महेंद्र जाधव यांसह विविध सप्लायर्स, क्रेडिटर्स, कर्मचारी व कामगार मोठ्या संख्येने उपस्थित होते.

श्रीमंत संजीवराजे पुढे म्हणाले की, कै. योगेश पाटील आणि दिलीपराव शिंदे यांनी पंचवीस वर्षांपूर्वी सुरू केलेली सगुणमाता कन्स्ट्रक्शन आज आपल्या उच्च दर्जाच्या कामामुळे वेगळा ठसा उमटवत आहे. यशवंत पाटील, अभिजीत शिंदे आणि दिलीपराव शिंदे यांच्या मार्गदर्शनाखाली सगुणमाता कन्स्ट्रक्शनच्या अल्पावधीत अनेक उत्कृष्ट प्रकल्प पूर्ण केले आहेत. नर्सिंग कॉलेज, इंजिनिअरिंग कॉलेज आणि मधोजी हायस्कूलच्या नवीन इमारतींचे बांधकाम हे कंपनीच्या कार्यकौशल्याचे उत्तम उदाहरण असल्याचे त्यांनी नमूद केले.

प्रास्ताविक भाषणात दिलीपराव शिंदे सरांनी सगुणमाता कन्स्ट्रक्शनच्या प्रगतीचा आढावा घेत, सुरू असलेल्या प्रकल्पांची माहिती उपस्थितांना दिली. कार्यक्रमादरम्यान सगुणमाता कन्स्ट्रक्शनबरोबर गेल्या पंचवीस वर्षांपासून कार्यरत असलेल्या अभियंते, कर्मचारी, कामगार व सप्लायर्स यांचा श्रीमंत संजीवराजे ना. निंबाळकर यांच्या हस्ते सन्मान करण्यात आला.