फलटण : डॉक्टर संपदा मुंडे यांच्या मृत्यू प्रकरणाने केवळ महाराष्ट्रच नव्हे तर देशपातळीवरही तीव्र प्रतिक्रिया उमटवली आहे. सामाजिक कार्यकर्ते, आरोग्यसेवक आणि विविध राजकीय नेत्यांनी या घटनेचा निषेध नोंदवत सखोल चौकशीची मागणी केली आहे.
दरम्यान, साखरवाडी (ता. फलटण) येथे झालेल्या एका कार्यक्रमात माजी विधान परिषद सभापती आणि आ. श्रीमंत रामराजे नाईक निंबाळकर यांनी भाषणात म्हटले की, “फलटणमधील या घटनेमुळे नाईक-निंबाळकर ब्रँडला धक्का बसला आहे. प्रशासनाकडे आम्ही डॉ. संपदा मुंडे यांचा पुतळा फलटण उपजिल्हा रुग्णालयाच्या आवारात उभारण्याची मागणी करणार आहोत. ती मागणी मान्य न झाल्यास तो पुतळा आम्ही स्वखर्चातून उभारू मग कोण आडवे येते ते पाहू.”
दरम्यान, डॉ. संपदा मुंडे प्रकरणाच्या निषेधार्थ बीड बंद नंतर आता फलटणमध्येही कॅण्डल मार्च आयोजित करण्यात येणार आहे.हा कॅण्डल मार्च १ नोव्हेंबर २०२५ रोजी सायंकाळी सात वाजता गजानन चौक येथील महात्मा गांधी यांच्या पुतळ्यापासून निघणार असून, सर्व फलटणकरांनी सहभागी व्हावे असे आवाहन करण्यात आले आहे.
