फलटण – स्थानिक स्वराज्य संस्थेच्या निवडणुकीच्या पार्श्वभूमीवर फलटणमध्ये राजकीय घडामोडींना वेग आला असून वातावरण थंडीत गरम झाले आहे. महाराष्ट्र विधान परिषदेचे माजी सभापती व आमदार श्रीमंत रामराजे ना. निंबाळकर आज आपल्या राजे गटाचा निवडणूक मार्ग निश्चित करताना कोणत्या पक्षाचा झेंडा हाती घ्यायचा, की अपक्ष म्हणूनच मैदानात उतरायचे, याबाबतचा महत्त्वपूर्ण निर्णय जाहीर करण्याची शक्यता वर्तवली जात आहे.
कारण, फलटण नगरपालिकेच्या उमेदवारी अर्ज दाखल करण्यास आता अवघे चार दिवस शिल्लक राहिले आहेत. मागील दोन दिवसांच्या मुंबई दौऱ्यात रामराजे यांनी नक्की कोणाची भेट घेतली, कोणती राजकीय रणनीती आखली आणि कोणत्या पक्षाशी जवळीक साधली याबाबत विविध अटकळी रंगू लागल्या आहेत.
आज बिबी ता. फलटण येथे होणाऱ्या कार्यक्रमात श्रीमंत रामराजे फलटणमधील राजकीय घडामोडींवर कोणती भूमिका मांडतात, याकडे संपूर्ण तालुक्याचे लक्ष लागले आहे. आजचा निर्णय फलटण नगरपरिषद निवडणुकीतील समीकरणांवर मोठा प्रभाव टाकणारा ठरणार आहे.
