फलटण नगरपालिकेच्या उमेदवारी अर्ज दाखल करण्याच्या दुसऱ्या दिवशीही शून्य अर्ज – मुख्याधिकारी निखिल जाधव

फलटण – फलटण नगरपरिषद निवडणूक 2025 साठी उमेदवारी अर्ज दाखल करण्यास 10 नोव्हेंबरपासून सुरुवात झाली असली तरी दुसऱ्या दिवशीदेखील एकही अर्ज दाखल झाला नाही. निवडणूक प्रक्रियेप्रमाणे अर्ज दाखल करण्याची शेवटची तारीख 17 नोव्हेंबर 2025 असून अर्जांची छाननी 18 नोव्हेंबर रोजी होणार आहे. तर अर्ज मागे घेण्याची अंतिम तारीख 25 नोव्हेंबर 2025 निश्चित करण्यात आली आहे.

मतदान 2 डिसेंबर 2025 रोजी पार पडणार असून मतमोजणी 3 डिसेंबर रोजी होईल. याच दिवशी फलटण नगरपालिकेच्या 27 नगरसेवकांसह नगराध्यक्षपदाच्या निवडणुकीत विजयी उमेदवारांचा गुलाल उडणार आहे.

दरम्यान, फलटणमधील प्रमुख राजकीय नेत्यांकडून अद्याप उमेदवारांची अधिकृत घोषणा न झाल्याने अपक्ष आणि इतर संभाव्य उमेदवार देखील अर्ज दाखल करण्यास टाळाटाळ करत आहेत. त्यामुळे अर्ज दाखल करण्याच्या दुसऱ्या दिवशीही शून्य अर्जांची नोंद झाली आहे.

फलटण नगरपालिकेचे मुख्याधिकारी तथा प्रशासक श्री. निखिल जाधव यांनी स्पष्ट केले की, दुसऱ्या दिवशीदेखील एकही उमेदवारी अर्ज दाखल झालेला नाही.