🚨 हिट अँड रन! वाठार निंबाळकर येथे अज्ञात चारचाकीची दुचाकीला धडक; महिलेचा मृत्यू

फलटण : फलटण-पुसेगाव मार्गावरील वाठार निंबाळकर गावच्या हद्दीत अज्ञात चारचाकी वाहनाने दुचाकीला जोरदार धडक दिल्याने झालेल्या अपघातात सुचिता अमर चव्हाण (वय २७) यांचा उपचारादरम्यान मृत्यू झाला. या अपघातात दुचाकीवरील अमर धोंडीराम चव्हाण आणि त्यांच्या दोन मुली आरोही व आराध्या जखमी झाल्या आहेत. ही घटना १५ ऑक्टोबर २०२६ रोजी रात्री सुमारे ८.४५ वाजण्याच्या सुमारास सुनील कुंभार यांच्या वीटभट्टीजवळ घडली.

पोलिसांनी दिलेल्या माहितीनुसार, अमर चव्हाण हे पत्नी सुचिता आणि दोन मुलींना दुचाकीवरून घेऊन जात असताना पुसेगावच्या दिशेने येणाऱ्या अज्ञात चारचाकी वाहनाने चुकीच्या बाजूने येत भरधाव वेगात दुचाकीला समोरून धडक दिली. अपघातानंतर चालक जखमींना वैद्यकीय मदत न करता आणि पोलिसांना माहिती न देता घटनास्थळावरून पळून गेला. सुचिता चव्हाण यांना उपचारासाठी पुण्यातील रुबी हॉस्पिटल येथे दाखल करण्यात आले होते. मात्र, उपचारादरम्यान त्यांचा मृत्यू झाला.

या प्रकरणी महेंद्र भगवान पुंडेकर (वय ३५, रा. वाठार निंबाळकर) यांच्या फिर्यादीवरून फलटण ग्रामीण पोलीस ठाण्यात अज्ञात चारचाकी वाहनचालकाविरुद्ध गुन्हा क्रमांक ६११/२०२६ अन्वये भारतीय न्याय संहिता कलम १०६, १२५(अ), १२५(ब), २८१ तसेच मोटार वाहन अधिनियमातील संबंधित कलमांनुसार गुन्हा दाखल करण्यात आला आहे. पोलीस उपनिरीक्षक दीपक पवार या प्रकरणाचा तपास करत असून, अज्ञात वाहनाचा शोध सुरू आहे. या अपघाताबाबत कोणाला माहिती असल्यास फलटण ग्रामीण पोलीस ठाण्याशी ०२१६६-२२२५३३ किंवा API प्रशांत सुबनावळ (८६०५०४२७७७) यांच्याशी संपर्क साधण्याचे आवाहन पोलिसांनी केले आहे.