फलटण (प्रतिनिधी): लोकशाही भारत न्यूज नेटवर्कचा 2025 चा “आद्य दीपोत्सव” दिवाळी विशेषांक के. बी. बायो ऑर्गेनिक्स प्रा. लि. चे असिस्टंट जनरल मॅनेजर आदरणीय श्री. हेमंत खलाटे यांच्या शुभहस्ते प्रकाशित करण्यात आला. हा प्रकाशन सोहळा खुंटे (ता. फलटण) येथील के. बी. उद्योग समूहाच्या कॉन्फरन्स कार्यालयात पार पडला. विशेष म्हणजे, दिनांक 4 नोव्हेंबर 2025 हा श्री. हेमंत खलाटे यांचा वाढदिवस असून, त्याच दिवशी विशेषांकाचे प्रकाशन होण्याचा दुग्धशर्करा योग साधला.
के. बी. उद्योग समूहाने फलटण तालुका आणि परिसरातील असंख्य युवक-युवतींना रोजगाराच्या संधी उपलब्ध करून दिल्या आहेत. हजारो कामगार या समूहात कार्यरत असून, के. बी. बायो ऑर्गेनिक्स प्रा. लि. ही देशातील सेंद्रिय उत्पादने तयार करणारी अग्रगण्य कंपनी म्हणून ओळखली जाते. कंपनीचे संस्थापक श्री. सचिन यादव यांनी खुंटे या ग्रामीण भागात उभारलेली ही संस्था आज आंतरराष्ट्रीय स्तरावर ग्रामीण शेतकऱ्यांच्या उत्पादनांना बाजारपेठ उपलब्ध करून देत आहे. त्यांच्या प्रयत्नांमुळे स्थानिक शेतमाल विदेशात निर्यात होत असून, शेतकऱ्यांना योग्य भाव मिळून त्यांचे जीवनमान उंचावत आहे.
अशा प्रतिष्ठित संस्थेचे असिस्टंट जनरल मॅनेजर श्री. हेमंत खलाटे यांच्या हस्ते लोकशाही भारत दिवाळी विशेषांकाचे प्रकाशन होणे ही गौरवाची बाब ठरली आहे. लोकशाही भारत न्यूज नेटवर्क सध्या आपल्या चौथ्या वर्षात पदार्पण करत असून, अल्पावधीतच निर्भीड, निष्पक्ष आणि रोखठोक पत्रकारितेच्या माध्यमातून वाचक आणि प्रेक्षकांचा विश्वास संपादन करण्यात यशस्वी ठरले आहे.
प्रकाशन सोहळ्यावेळी पत्रकार श्री. सागर चव्हाण, श्री. अशांत साबळे, श्री. प्रशांत धायगुडे, श्री. प्रवीण नाळे, श्री. हेमंत होळकर, श्री. लक्ष्मण पाटील तसेच के. बी. उद्योग समूहातील कर्मचारी उपस्थित होते.
