फलटण – फलटण नगरपरिषदेच्या कर विभागामार्फत मोठ्या प्रमाणात थकीत कर असणाऱ्या मालमत्ता धारकांकडून थकीत कराची रक्कम वसूल करण्यासाठी विशेष मोहीम हाती घेण्यात आली आहे. सदर मोहीम मा. मुख्याधिकारी श्री. निखिल जाधव यांच्या सूचनेनुसार सुरू करण्यात आली असून, कर अधिकारी श्री. राजेश काळे व कर निरीक्षक श्री. रोहित जमदाडे यांच्या नियंत्रणाखाली तीन स्वतंत्र पथके नेमण्यात आली आहेत.
वसुली पथकाकडून थकबाकीदार मालमत्ता धारकांचे गाळे सील करण्याची कारवाई सुरू करण्यात आली आहे. तसेच, मालमत्ता धारक व नगरपरिषदेच्या मालकीचे गाळेधारक यांनी थकीत कराची रक्कम अदा न केल्यास गाळे सील करणे, जंगम मालमत्ता जप्त करणे तसेच नळ कनेक्शन बंद करणे यासारखी कठोर कारवाई करण्यात येणार आहे.
तरी, फलटण शहरातील सर्व मालमत्ता धारकांनी सन २०२५–२६ या आर्थिक वर्षासह थकीत मालमत्ता कर व पाणीपट्टी तात्काळ भरून नगरपरिषदेस सहकार्य करावे, असे आवाहन नगरपरिषदेकडून करण्यात आले आहे. अन्यथा कर वसुलीची ही मोहीम पुढील काळात अधिक तीव्र करण्यात येईल, याची सर्व थकीत मालमत्ता धारक व नगरपरिषदेच्या मालकीचे गाळेधारकांनी नोंद घ्यावी, असे फलटण नगरपालिकेचे मुख्याधिकारी श्री निखिल जाधव यांनी कळविले आहे.
