फलटण : फलटण शहर पोलीस ठाण्याचे पोलीस निरीक्षक हेमंतकुमार शहा यांची जिल्हा पोलीस प्रमुख तुषार दोशी यांनी तडकाफडकी बदली केल्याची माहिती सूत्रांकडून मिळाली आहे. गेल्या दोन वर्षांपासून फलटण शहरात कायदा व सुव्यवस्थेची स्थिती अत्यंत ढासळलेली होती. अनेक अवैध धंद्यांना उधाण आले होते आणि नागरिकांमध्ये नाराजीचे वातावरण निर्माण झाले होते. सूत्रांकडून मिळालेल्या माहितीनुसार, फलटण शहरातील डी.जे. प्रकरण आणि चक्री व्यवसायाला शहर पोलीस आणि पोलीस निरीक्षक हेमंतकुमार शहा हे जबाबदार असल्याचे वृत्त विविध माध्यमांत प्रसिद्ध झाल्यानंतर जिल्हा पोलीस प्रशासनाने तातडीने ही बदली केली असल्याचे समजते.
दरम्यान, आता फलटण शहरात हजर होणारे नूतन पोलीस निरीक्षक अरविंद काळे यांच्यासमोर शहरातील मटका-जुगार, चक्री, अवैध धंदे, वाहतूक कोंडी, घरफोडी, चोरी, लुटमार, रोडरोमियो त्रास,मुलींची छेडछाड, वाहन चोरी आणि फसवणूक यांसारख्या वाढत्या गुन्ह्यांवर आळा घालण्याचे मोठे आव्हान आहे.फलटण शहरातील नागरिकांचे लक्ष आता नव्या पोलीस निरीक्षक अरविंद काळे यांच्या कामगिरीकडे लागले आहे.
