फलटण : क्रांतीसूर्य महात्मा ज्योतिबा फुले यांची यंदा १९९ वी जयंती उत्साहात साजरी करण्यात आली असून उद्यापासून त्यांच्या द्विशताब्दी जयंती वर्षाची सुरुवात होत आहे. या पार्श्वभूमीवर फलटण शहरात दरवर्षीप्रमाणे यंदाही भव्य आणि आकर्षक नियोजन करण्यात आले होते.
जयंतीनिमित्त ग्रामविकास मंत्री जयकुमार गोरे यांनी फलटण येथील महात्मा ज्योतिबा फुले यांच्या स्मारकास भेट देऊन पुष्पहार अर्पण करत अभिवादन केले. मंत्री गोरे हे दरवर्षी जयंतीनिमित्त फलटणमध्ये येऊन अभिवादन करतात. त्याच परंपरेनुसार यंदाही त्यांनी आवर्जून उपस्थिती लावली.
यावेळी फलटण-कोरेगाव मतदारसंघाचे आमदार सचिन पाटील, फलटण नगरपालिकेचे नगराध्यक्ष समशेरसिंह नाईक निंबाळकर, तसेच भारतीय जनता पार्टी व राष्ट्रवादी काँग्रेस पक्षाचे स्थानिक स्वराज्य संस्थांमधील नवनियुक्त पदाधिकारी उपस्थित होते. याशिवाय नागरिक आणि जयंती महोत्सव समितीचे सदस्य मोठ्या संख्येने उपस्थित होते.
