फलटण – फलटण नगरपालिका निवडणुकीच्या पार्श्वभूमीवर शहरातील राजकीय हालचालींना वेग आला आहे. यामध्ये माजी खासदार रणजितसिंह नाईक निंबाळकर यांनी कोणत्याही परिस्थितीत नगरपालिका आपल्या नेतृत्वाखाली जिंकण्याचा चंग बांधल्याने, राजकीय समीकरणांमध्ये मोठे बदल घडताना दिसत आहेत.
“बदला नाही, बदल घडवायचा आहे” या निर्धाराने रणजितसिंह नाईक निंबाळकर यांनी आपले लक्ष नगरपालिकेवर केंद्रित केले असून, प्रत्येक प्रभागात सशक्त उमेदवार उभे करण्याचे काम सुरू आहे. त्यासाठी त्यांनी श्रीमंत रामराजे नाईक निंबाळकर यांच्या गटातील काही प्रभावी नेते आणि कार्यकर्त्यांना आपल्या गटात घेतले आहे.
या पार्श्वभूमीवर राजे गटातही हालचालींना वेग आला असून, पाठीमागे राजेगट फुटत असताना श्रीमंत रामराजे नाईक निंबाळकर यांनी मुंबईत दोन दिवसांच्या दौऱ्यात काही महत्त्वाचा निर्णय घेतला असून त्यांनी यामध्ये नवीन प्लॅन आखल्याची माहिती मिळत आहे . सूत्रांकडून मिळालेल्या माहितीनुसार, श्रीमंत रामराजे, श्रीमंत रघुनाथराजे आणि श्रीमंत संजीवराजे हे तिघेही एकत्र राज्यातील सत्ताधारी महायुतीतील प्रमुख पक्षाच्या नेतृत्वाखाली पुन्हा एकदा फलटण नगरपालिका आपल्या ताब्यात घेण्यासाठी “दहशतमुक्त फलटण” या टॅग लाईन खाली आपली संपूर्ण ताकद पणाला लावण्याची शक्यता वर्तवली जात आहे.
यामुळे फलटण नगरपरिषद निवडणूक ही दोन प्रमुख पक्षांच्या थेट लढतीत रंगणार असल्याचे राजकीय वर्तुळात बोलले जात आहे. या लढतीत कोण विजयी ठरणार आणि फलटणच्या नगरपालिकेत पुन्हा ‘रामराज्य’ येणार का? की खासदार गटाकडे फलटण नगरपालिका जाणार याकडे फक्त फलटण तालुका नाहीतर संपूर्ण सातारा जिल्ह्याचे लक्ष लागले आहे .
