फलटण : डॉ. बाबासाहेब आंबेडकर यांच्या १३५ व्या जयंतीनिमित्त फलटण शहरात विविध कार्यक्रमांचे आयोजन करण्यात आले आहे. यानिमित्त सातारा जिल्हा परिषदेचे मा. अध्यक्ष श्रीमंत संजीवराजे ना.निंबाळकर व फलटण नगरपालिकेचे नगराध्यक्ष समशेरसिंह ना निंबाळकर यांनी डॉ. बाबासाहेब आंबेडकर चौक येथील स्मारकास अभिवादन केले. यावेळी शहरातील विविध मान्यवर उपस्थित होते.
तसेच, शहरात आगमन झालेल्या ज्योतीचे स्वागत बाणगंगा नदीवरील सातारा पुलावर तहसीलदार तथा कार्यकारी दंडाधिकारी डॉ. अभिजीत जाधव व शहर पोलीस स्टेशनचे पोलीस निरीक्षक अरविंद काळे यांच्या हस्ते करण्यात आले. बारामती चौक व फलटण बसस्थानक परिसरातील रिक्षा स्टॉपच्या वतीने अन्नदान व रक्तदान शिबिराचे आयोजन करण्यात आले आहे.
संध्याकाळी 6.00 वाजता मंगळवार पेठ येथून मा. विधानपरिषद सभापती श्रीमंत रामराजे ना.निंबाळकर, मा. खासदार रणजितसिंह ना. निंबाळकर व आमदार सचिन पाटील यांच्या हस्ते भव्य मिरवणुकीचा शुभारंभ करण्यात येणार आहे. यावर्षी जयंती महोत्सवानिमित्त मंगळवार पेठ, रविवार पेठ व डॉ. बाबासाहेब आंबेडकर चौक परिसरात आकर्षक विद्युत रोषणाई व सजावट करण्यात आली आहे.
यंदाचे विशेष आकर्षण म्हणजे Columbia University येथील लायब्ररीची प्रतिकृती उभारण्यात आली असून, नागरिकांचे विशेष लक्ष वेधून घेत आहे. या अनोख्या सजावटीमुळे जयंती मंडळाचे अध्यक्ष हरीश काकडे व सर्व जयंती मंडळाच्या सदस्यांचे सर्व स्तरातून कौतुक होत आहे. संध्याकाळची भव्य मिरवणूकही पाहण्यासारखी ठरणार आहे.
