फलटणच्या अंतर्गत रस्त्यांसाठी ७० कोटींचा निधी मंजूर; रणजितसिंह नाईक निंबाळकरांच्या पाठपुराव्याला यश

केंद्रीय मंत्री नितीन गडकरी यांची मंजुरी; आमदार सचिन पाटील यांच्यासह दिल्लीत बैठक • शहरातील प्रमुख रस्ते सिमेंट काँक्रीटचे होणार

दिल्ली – फलटण शहरातील अंतर्गत रस्त्यांच्या विकासासाठी केंद्रीय रस्ते वाहतूक व महामार्ग मंत्रालयाकडून ७० कोटी रुपयांचा निधी मंजूर करण्यात आला आहे. माढा लोकसभा मतदारसंघाचे माजी खासदार रणजितसिंह नाईक निंबाळकर आणि फलटणचे आमदार सचिन पाटील यांनी बुधवारी दि. १५ नवी दिल्ली येथे केंद्रीय मंत्री नितीन गडकरी यांची भेट घेऊन शहरातील रस्त्यांच्या दुरवस्थेबाबत निवेदन सादर केले. त्यानंतर या निधीला मंजुरी देण्यात आल्याची माहिती देण्यात आली.

बैठकीत फलटण शहरातील अंतर्गत रस्त्यांची दुरवस्था, वाढती वाहतूक आणि दर्जेदार रस्त्यांची गरज याकडे लक्ष वेधण्यात आले. त्यानंतर केंद्रीय मंत्री नितीन गडकरी यांनी ७० कोटी रुपयांचा निधी मंजूर करत संबंधित अधिकाऱ्यांना आवश्यक कार्यवाही करण्याचे निर्देश दिल्याचे सांगण्यात आले.

या निधीमुळे फलटण शहरातील प्रमुख अंतर्गत रस्ते सिमेंट काँक्रीटचे करण्यात येणार असून शहरातील वाहतुकीला दिलासा मिळणार आहे.

यापूर्वीही फलटण शहरातून जाणाऱ्या पालखी महामार्गासाठी सुमारे ७५ कोटी रुपये तसेच ‘मिसिंग लिंक’ मार्गासाठी ९७ कोटी रुपयांचा निधी मंजूर करण्यात आला आहे. नव्या ७० कोटी रुपयांच्या निधीमुळे शहरातील रस्ते विकासाच्या कामांना आणखी गती मिळणार असल्याचे सांगितले जात आहे.

यावेळी माजी खासदार रणजितसिंह नाईक निंबाळकर यांनी केंद्रीय मंत्री नितीन गडकरी तसेच मुख्यमंत्री देवेंद्र फडणवीस यांचे आभार मानले. राज्य आणि केंद्र सरकारच्या सहकार्याने फलटण शहर व तालुक्याच्या विकासासाठी भविष्यातही आवश्यक निधी उपलब्ध करून देण्यासाठी प्रयत्न सुरू राहतील, असा विश्वास त्यांनी व्यक्त केला.