“आद्य दीपोत्सव – लोकशाही भारत दिवाळी विशेषांक २०२५”

नमस्कार!

“आद्य दीपोत्सव – लोकशाही भारत दिवाळी विशेषांक २०२५” प्रकाशित होत असताना आम्हाला अत्यंत आनंद आणि अभिमान वाटतो. या वर्षी लोकशाही भारत न्यूज नेटवर्क आपल्या कार्याच्या चौथ्या वर्षात पदार्पण करत आहे. मागील विशेषांकापेक्षा यंदाचा ‘आद्य दीपोत्सव’ अधिक नाविन्यपूर्ण असून, विविध लेख आणि कवितांमधून विचारांच्या तेजाने उजळलेला आहे. मुखपृष्ठ पाहिल्यावर आपल्या मनात नक्कीच प्रश्न येईल – “या मुखपृष्ठावर दिसणारे पावलांचे ठसे कोणाचे?” तर मंडळी, हे ठसे माझ्या लाडक्या कन्येचे आहेत. ‘आद्य दीपोत्सव’ म्हणजे पहिला दीपोत्सव – आणि या दिवाळीत आमच्या छोट्या गोजिऱ्या बाळाला अवघे चार महिने पूर्ण झाले आहेत. तिच्या आगमनामुळे आमच्या कुटुंबात एक नवीन, मंगलमय आणि आनंददायी वातावरण निर्माण झाले आहे.

आज अनेक कुटुंबांमध्ये मुलगा-मुलगी असा कोणताही भेदभाव केला जात नाही. कारण मुलगी ही केवळ घराची पणती नसून घरातील दीपक आहे – जी घर उजळवते आणि संस्कारांनी प्रकाशमान करते. भारतीय संस्कृतीत पावलांचे ठसे पूजनीय मानले जातात, आणि दीपोत्सव म्हणजेच दिवाळी हा प्रकाश, मंगलता आणि नवउमेद घेऊन येणारा सण आहे. म्हणूनच या विशेषांकाला आम्ही ‘आद्य दीपोत्सव’ असे नाव दिले आहे, कारण हा आमच्या कन्येचा पहिलाच दीपोत्सव असून, तो आमच्या जीवनातील एक नवा आरंभ दर्शवतो. मुखपृष्ठावरील संकल्पना साकार करण्याची प्रेरणा माझ्या सौभाग्यवती प्रमिला (दीक्षा) हिची आहे. तिच्याच सूचनेवर आम्ही आमच्या बाळाच्या पावलांचे छायाचित्र मुखपृष्ठावर घेण्याचा निर्णय घेतला, जे भारतीय परंपरेतील शुभत्वाचे प्रतीक आहे. या संकल्पनेला वास्तव रूप देण्याचे श्रेय आमचे मित्र, उत्कृष्ट डिझायनर अमन खान यांना जाते.

या विशेषांकात कायदेशीर सल्लागार एडव्होकेट आकाश आढाव यांनी विविध लेखकांचे लेख आणि कवींच्या कवितांची निवड करून मार्गदर्शनाच्या माध्यमातून हा अंक अधिक समृद्ध केला आहे. पुढील विशेषांकात नवोदित लेखक व कवींना आपले साहित्य प्रसिद्ध करण्याची संधी दिली जाईल. या अंकाची मांडणी श्री. राहुल पंडित यांनी केली आहे. या निर्मितीत मनःपूर्वक सहकार्य करणाऱ्या सर्व लेखक, कवी, जाहिरातदार, वाचकवर्ग आणि हितचिंतक यांचा मी मनापासून ऋणी आहे. आपल्याला हा विशेषांक कसा वाटला, याबद्दलची प्रतिक्रिया कळवा.

श्री.सागर राजेंद्र चव्हाण
मुख्य संपादक, लोकशाही भारत न्यूज नेटवर्क