फलटण -आखाती देशांतील तणावपूर्ण परिस्थितीच्या पार्श्वभूमीवर गॅस टंचाईबाबत नागरिकांमध्ये संभ्रम निर्माण होऊ नये आणि वितरणात पारदर्शकता राहावी यासाठी प्रशासनाकडून घरगुती गॅस वितरणावर बारकाईने लक्ष ठेवले जात आहे. याच अनुषंगाने फलटणचे तहसीलदार डॉ. अभिजित जाधव यांनी तालुक्यातील घरगुती गॅस (एलपीजी) वितरणाचा अधिकृत दैनंदिन अहवाल प्रसिद्ध केला आहे.
प्रशासनाने दिलेल्या माहितीनुसार फलटण तालुक्यात एकूण ९४ हजार ४१७ घरगुती गॅस ग्राहक नोंदणीकृत आहेत. यामध्ये एक गॅस जोडणी असलेले ४८ हजार २३७ तर दोन गॅस जोडणी असलेले ४६ हजार १८० ग्राहकांचा समावेश आहे.
गुरुवारच्या अहवालानुसार तालुक्यातील सर्व गॅस एजन्सीकडे मिळून सुरुवातीला २ हजार १९६ सिलिंडर शिल्लक होते. त्यानंतर १ हजार ६५६ सिलिंडरची नवीन आवक झाल्याने एकूण ३ हजार ८५२ सिलिंडर उपलब्ध झाले. दिवसभरात ४ हजार २९२ ग्राहकांनी गॅसचे बुकिंग केले असून प्रत्यक्षात २ हजार २११ घरगुती गॅस सिलिंडरचे वितरण करण्यात आले. दिवसअखेर १ हजार ६४१ सिलिंडर शिल्लक राहिल्याची नोंद करण्यात आली आहे.
फलटण तालुक्यात एच. डी. लाटकर एचपी, सूर्या एचपी, सूर्यतारा एचपी, विक्रम भारत, विघ्नहर्ता भारत, पवार भारत, नंदन तरडगाव, सुदर्शन आसु भारत आणि दुर्वांकुर इंडेन या नऊ गॅस वितरक संस्था कार्यरत आहेत.
सध्या व्यावसायिक गॅसचा पुरवठा काही प्रमाणात मर्यादित असल्याने सर्वसामान्य नागरिकांची गैरसोय होऊ नये यासाठी महसूल प्रशासन सतर्क आहे. तसेच घरगुती गॅसचा काळाबाजार किंवा हॉटेलमध्ये व्यावसायिक वापर होऊ नये यासाठी तहसीलदार व पुरवठा विभागाकडून गॅस एजन्सींच्या साठा व वितरणावर करडी नजर ठेवण्यात येत असून दररोज हा अहवाल तयार केला जात असल्याची माहिती प्रशासनाने दिली आहे.
