फलटण : फलटण उपजिल्हा रुग्णालयात कार्यरत असलेल्या वैद्यकीय अधिकारी डॉ. संपदा मुंडे यांनी फलटण शहरातील एका हॉटेलमध्ये आत्महत्या केल्याची धक्कादायक घटना घडली आहे. विशेष म्हणजे, त्यांनी आत्महत्येपूर्वी आपल्या तळहातावर आत्महत्येचे कारण लिहून ठेवले होते, असे समोर आले आहे.या घटनेने संपूर्ण वैद्यकीय क्षेत्रात खळबळ उडाली असून, त्यांच्या मृत्यूस कारणीभूत ठरलेल्या व्यक्तींची निष्पक्ष आणि सखोल चौकशी व्हावी अशी मागणी फलटण डॉक्टर असोसिएशनने केली आहे. असोसिएशनच्या म्हणण्यानुसार, सेवाकाळात डॉ. मुंडे यांना मानसिक आणि शारीरिक छळ सहन करावा लागला, त्यामुळेच त्यांनी टोकाचे पाऊल उचलले असावे.
फलटण डॉक्टर असोसिएशनच्या वतीने प्रांताधिकारी फलटण सौ. प्रियांका आंबेकर यांना सादर केलेल्या निवेदनात म्हटले आहे की, “या घटनेत जबाबदार असलेल्या शासकीय अधिकारी तसेच इतर संबंधित व्यक्तींची फास्टट्रॅक चौकशी व्हावी आणि दोषींवर कठोर कारवाई करण्यात यावी.” तसेच अशा प्रकारच्या घटना पुन्हा घडू नयेत यासाठी पोलीस आणि शासकीय यंत्रणांनी अधिक दक्षता घ्यावी, अशी मागणी करण्यात आली आहे.अशा घटना समाजाला काळीमा फासणाऱ्या असून, वैद्यकीय सेवेत असलेल्या महिला अधिकाऱ्याच्या आत्महत्येसारखी घटना अतिशय निंदनीय असल्याचे असोसिएशनने स्पष्ट केले आहे.
निवेदन देताना फलटण डॉक्टर असोसिएशनचे अध्यक्ष डॉ. बी. के. यादव, उपाध्यक्ष डॉ. महेश शिंदे, खजिनदार डॉ. दत्ता चव्हाण, सचिव डॉ. ईशांत शिंदे, तसेच डॉ. सुधीर कुलकर्णी, डॉ. माधव पोळ, डॉ. जे. टी. पोळ, डॉ. दोशी, डॉ. सुनिता पोळ, डॉ. अशोक नाळे आदी मान्यवर उपस्थित होते.
