फलटण – फलटण येथे डॉ. बाबासाहेब आंबेडकर यांच्या 135 व्या जयंतीनिमित्त आयोजित करण्यात आलेला जयंती महोत्सव 2026 हा अत्यंत भव्य, देखणा आणि प्रेरणादायी ठरला. अध्यक्ष हरीश काकडे यांच्या नेतृत्वाखाली करण्यात आलेल्या नियोजनाचे सर्व स्तरांतून कौतुक होत आहे.
बारामती पुलापासून पंचायत समिती फलटण तसेच शिवाजी महाराज चौक ते डॉ. बाबासाहेब आंबेडकर चौक( छत्रपती शिवाजी महाराज चौक सजावट ), डॉक्टर बाबासाहेब आंबेडकर चौक ते महावीरस्तंभ या परिसरात उभारण्यात आलेली आकर्षक विद्युत रोषणाई नागरिकांचे लक्ष वेधून घेत होती. विशेषतः डॉ. बाबासाहेब आंबेडकर चौक येथे उभारलेली कोलंबिया युनिव्हर्सिटी लायब्ररी मधील बाबासाहेबांनी अभ्यास केलेल्या ग्रंथालयाची प्रतिकृती हे प्रमुख आकर्षण ठरले. त्यासोबतच उभारलेली तथागतांची मूर्ती आणि संपूर्ण सजावट जयंतीच्या भव्यतेला साजेशी होती.
भव्य मिरवणुकीतून बाबासाहेबांच्या कार्याचा प्रभाव स्पष्टपणे दिसून आला. त्यांच्या कायद्यामुळे महिलांना विविध क्षेत्रात सन्मानाने कार्य करण्याची संधी मिळाली असून, त्यांच्या पत्रकारितेच्या कार्याचा वारसा देखील यावेळी जनतेसमोर प्रभावीपणे मांडण्यात आला.
या जयंती महोत्सवाबद्दल जनतेमधूनही उत्स्फूर्त प्रतिक्रिया उमटल्या. संतोष अहिवळे यांनी सांगितले की, “जयंतीचा सोहळा अत्यंत नेत्रदीपक झाला. नियोजन खूप छान होते. बाबासाहेबांच्या कार्याला साजेसा उत्सव पाहून मन भरून आले.”
तसेच विशाल पाटील यांनी प्रतिक्रिया देताना सांगितले की, “गेल्या अनेक वर्षांत असा उत्कृष्ट कार्यक्रम पाहिला नव्हता. सुरुवातीच्या शंकांना छेद देत जयंती मंडळाने प्रभावी नियोजन करून सर्वांना सकारात्मक संदेश दिला. समाजाने अशा कार्याला पाठबळ द्यावे.”
एकूणच, डॉ. बाबासाहेब आंबेडकर जयंती महोत्सव 2026 हा फलटण शहरासाठी एक आदर्श आणि स्मरणीय उत्सव ठरला असून, अध्यक्ष हरीश काकडे व संपूर्ण जयंती समितीचे सर्वत्र अभिनंदन होत आहे.
