श्रीमंतांच्या गुगलीने फलटणच्या नगराध्यक्ष पदाचे वजन वाढलं! उमेदवारीच्या स्वप्नाने अनेकांची उडाली झोप!!

(सागर चव्हाण )फलटण – नगरपालिकेच्या निवडणुकीसाठी उमेदवारी अर्ज भरण्याचा प्रारंभ झाल्यानंतरही स्थानिक नेत्यांकडून अधिकृत उमेदवारी जाहीर झालेली नाही. याच पार्श्वभूमीवर माजी विधान परिषद सभापती आमदार श्रीमंत रामराजे ना. निंबाळकर यांनी पत्रकारांशी संवाद साधताना केलेल्या एका वक्तव्याने राजकीय वर्तुळात खळबळ उडाली आहे.

श्रीमंत रामराजे म्हणाले, “उपमुख्यमंत्री अजित पवार हे एका कारखान्याचे चेअरमन होऊ शकतात, तर मी फलटण नगरपालिकेचा नगराध्यक्ष का होऊ शकत नाही?”
या विधानाने त्यांनी नगराध्यक्ष पदासाठीची आपली तयारी सूचित करत एकप्रकारे राजकीय गुगलीच टाकली आहे. परिणामी, फलटणमधील नगराध्यक्ष पदाच्या इच्छुक नेत्यांची झोपच उडाली असल्याची चर्चा शहरात रंगू लागली आहे.

दरम्यान, खासदार गटाकडून नगराध्यक्ष पदासाठी दोन प्रमुख नेत्यांमध्ये रस्सीखेच सुरू असल्याचे समजते. सोशल मीडियावर श्री. समशेरसिंह नाईक निंबाळकर आणि श्री. दिलीपसिंह भोसले यांच्या समर्थनार्थ विविध व्हिडिओ आणि संदेश व्हायरल होत आहे.

दुसरीकडे, राजे गटाकडून श्रीमंतांनी गुगली टाकल्यानंतरही श्रीमंत अनिकेतराजेंचं नाव ९९ टक्के निश्चित असल्याची चर्चा राजकीय वर्तुळात सुरू आहे. मात्र, जर श्रीमंत रामराजे स्वतःच मैदानात उतरले, तर खासदार गटासाठी ही निवडणूक कठीण होऊ शकते, असा अंदाज वर्तवला जात आहे.