श्रीमंत रामराजे शिवधनुष्यबाणाने निशाणा साधणार?

फलटण – महाराष्ट्र विधान परिषदेचे माजी सभापती तथा आमदार श्रीमंत रामराजे ना. निंबाळकर हे विरोधकांचा शिवधनुष्यबाणाने फलटण नगरपालिका निवडणुकीत सामना करणार, अशी चर्चा सध्या फलटण तालुक्यात जोरदार सुरू आहे. दोन दिवसांच्या मुंबई दौऱ्यात त्यांनी शिवसेनाप्रमुख आणि राज्याचे उपमुख्यमंत्री श्री. एकनाथ शिंदे यांची ठाण्यामध्ये भेट घेतली असल्याची खात्रीशीर माहिती समोर आली आहे.

मुंबई दौरा आटोपून आल्यानंतर कालच्या आयोजित कार्यक्रमांमध्ये श्रीमंत रामराजे आपली भूमिका स्पष्ट करतील, अशी शक्यता व्यक्त करण्यात येत होती. मात्र तसे न होता त्यांनी संयमी भूमिका ठेवत राजे गटाच्या मुख्य पदाधिकाऱ्यांसोबत चर्चा सुरु ठेवली आहे. फलटण नगरपालिका निवडणुकीत शिवसेनेच्या ‘एबी फॉर्म’वर निवडणूक लढवायची का?, की आधी अधिकृतपणे शिवसेनेत प्रवेश करायचा? याबाबत अद्याप अंतिम निर्णय झाला नसल्याचे समजते.

दरम्यान, आज-उद्या राजे गटाची भूमिका स्पष्ट होण्याची दाट शक्यता व्यक्त होत आहे.