श्रीदत्त इंडिया प्रा. लि. साखर कारखान्यानेही ऊस दर केला जाहीर; ३३०० रुपये प्रति टन

साखरवाडी – फलटण तालुक्यातील श्रीराम सहकारी साखर कारखान्यानंतर आता श्रीदत्त इंडिया प्रा. लि. साखर कारखान्यानेही ऊसदराच्या कोंडीतून मार्ग काढत गळीत हंगाम 2025-26 साठी उसाला 3,300 रुपये प्रति टन इतका दर जाहीर केला आहे. कंपनीचे प्रशासकीय अधिकारी अजितराव जगताप यांनी ही माहिती मुख्य प्रशासकीय कार्यालयात झालेल्या बैठकीत दिली.

यावेळी बोलताना जगताप म्हणाले की, महाराष्ट्र विधान परिषदेचे माजी सभापती श्रीमंत रामराजे नाईक निंबाळकर, कंपनीच्या अध्यक्षा प्रीती रूपारेल व संचालक जितेंद्र धारू यांच्या मार्गदर्शनाखाली कंपनी सुयोग्यरीत्या पुढे जात आहे. शासन निर्णयानुसार कंपनीवर 3,056 रुपये इतकी एफआरपी रक्कम देणे बंधनकारक आहे. मात्र शेतकरी आणि संघटनांच्या मागणीचा विचार करून कंपनी अतिरिक्त 244 रुपये देत एकूण दर 3,300 रुपये प्रति टन जाहीर करत आहे.

जगताप यांनी सांगितले की, गाळपास आलेल्या ऊसाच्या पहिल्या पंधरवड्याचे पेमेंट शेतकऱ्यांच्या खात्यावर 3,200 रुपये प्रति टन या प्रमाणे जमा होणार असून उर्वरित 100 रुपये दिवाळीपूर्वी अदा केले जातील. फलटण तालुक्यासह कार्यक्षेत्रातील शेतकऱ्यांनी आपला सर्व ऊस श्रीदत्त इंडिया साखर कारखान्याला देऊन सहकार्य करावे, असे आवाहनही त्यांनी केले.

या बैठकीला जनरल मॅनेजर (केन) सदानंद पाटील, केन मॅनेजर रमेश बागणवर, टेक्निकल युनिट हेड अमोद पाल, डीजीएम अजित कदम, शेतकी अधिकारी दिगंबर माने, फलटण तालुका साखर कामगार युनियनचे सेक्रेटरी राजेंद्र भोसले, ऊस पुरवठा अधिकारी सुहास गायकवाड, तसेच पोपटराव भोसले, संतोष भोसले, ग्रा. प. सदस्य मच्छिंद्र भोसले आणि संजय जाधव आदी मान्यवर उपस्थित होते.