सातारा – आगामी सातारा जिल्हा परिषद व पंचायत समिती निवडणुका शिवसेनेच्या वतीने स्वबळावरच लढविण्याचा निर्णायक आदेश राज्याचे उपमुख्यमंत्री, नगरविकास मंत्री तथा शिवसेना पक्षप्रमुख ना. एकनाथ शिंदे यांनी दिला आहे. “जिल्ह्यात शिवसेनेची ताकद दाखवण्याची हीच वेळ आहे,” असा ठाम संदेश देत त्यांनी स्थानिक नेतृत्वाला सज्ज राहण्याच्या स्पष्ट सूचना केल्या आहेत.
सातारा येथील सैनिक स्कूल मैदानावर ना. एकनाथ शिंदे, पालकमंत्री ना. शंभूराज देसाई व ना. भरत गोगावले यांच्या उपस्थितीत श्रीमंत संजीवराजे नाईक निंबाळकर यांनी प्रत्यक्ष भेट घेत आगामी जिल्हा परिषद व पंचायत समिती निवडणुकांचा रणसंग्राम ताकदीने लढविण्याचा निर्धार व्यक्त केला. या बैठकीत संघटन मजबूत करणे, गावोगावी शिवसेना पोहोचवणे आणि विरोधकांना सडेतोड उत्तर देण्याचा राजकीय निर्धार करण्यात आला.
या निर्णायक चर्चेस शिवसेना जिल्हाप्रमुख चंद्रकांत जाधव, माजी नगराध्यक्ष तथा विद्यमान नगरसेवक पांडुरंग गुंजवटे, जिल्हा समन्वयक विराज खराडे, तालुका प्रमुख नानासो इवरे, ज्ञानेश्वर पवार, अमोल निंबाळकर, अॅड. संदीप कांबळे यांच्यासह जिल्ह्यातील शिवसैनिक मोठ्या संख्येने उपस्थित होते.
