फलटण : संतश्रेष्ठ श्री ज्ञानेश्वर महाराज पालखी सोहळ्यानिमित्त दि. १७ व १८ जुलै २०२६ रोजी फलटण शहर व परिसरातील वाहतुकीत महत्त्वाचे बदल करण्यात आले आहेत. पालखीसोबत असलेल्या वाहनांची सुरक्षित व सुरळीत वाहतूक सुनिश्चित करण्यासाठी फलटण शहर पोलीस ठाण्याने विशेष वाहतूक नियोजन जाहीर केले आहे.
दि. १७ जुलै – पालखी मुक्कामासाठी वाहनांचा मार्ग
पालखी फलटण विमानतळावरील मुक्कामस्थळी येताना वाहनांनी खालील मार्गाचा वापर करावा:
तांबमाळ → चौधरवाडी उड्डाणपूल → सस्तेवाडी उड्डाणपूल → कांबळेश्वर उड्डाणपूल → धुळदेव उड्डाणपुलाखालून यू-टर्न → बारामती रोड उड्डाणपूल → सोमवार पेठ → नाना पाटील चौक → दहिवडी चौक → डी.एड. चौक → गिरवी नाका → पालखी मुक्काम (फलटण विमानतळ).
या संपूर्ण मार्गावर पोलीस अधिकारी, कर्मचारी व होमगार्ड तैनात राहणार असून बॅरिकेडिंग व वाहतूक वळविण्याची व्यवस्था करण्यात आली आहे.
दि. १८ जुलै – विडणी व बरडकडे जाण्यासाठी पर्यायी मार्ग
पालखी विडणी विसाव्याकडे रवाना होताना वाहनांनी खालील मार्गाचा वापर करावा:
दहिवडी चौक → कोळकी तिकटणे → सोनवडी → वडले (फौजीनगर) → माझेरी → विडणी पालखी विसावा.
पिंप्रद जेवणाच्या विसाव्यासाठी : वडले गावातून डावीकडे वळून पिंप्रदकडे जावे.
बरड मुक्कामासाठी : पिंप्रद मार्गे पुढे मिरडे फाटा येथून डावीकडे वळून बरडकडे जावे.
फलटण शहर पोलीसांनी नागरिक, वारकरी व वाहनचालकांना आवाहन केले आहे की, वाहतूक सुरळीत राहण्यासाठी निश्चित करण्यात आलेल्या मार्गांचे पालन करावे, वाहतूक सूचनांचे काटेकोरपणे पालन करावे आणि पोलीस प्रशासनास सहकार्य करावे.
