गणेशमूर्ती विक्रीसाठी स्टॉलची जागा निश्चित; १३ सप्टेंबरचा आठवडी बाजार नव्या ठिकाणी

फलटण : गणेशोत्सवाच्या पार्श्वभूमीवर फलटण शहर तसेच शहरालगतच्या पंचक्रोशीतील सर्व भाजी विक्रेत्यांनी नगरपरिषदेच्या सूचनेनुसार सहकार्य करावे, असे आवाहन फलटण नगरपरिषदेचे मुख्याधिकारी श्री. निखिल जाधव यांनी केले आहे.

दिनांक १४ सप्टेंबर २०२६ रोजी गणेशोत्सव साजरा होत असल्याने फलटण शहरात गणेशमूर्ती विक्रीसाठी स्टॉल उभारण्याची व्यवस्था करण्यात आली आहे. गणेशमूर्ती विक्रेत्यांनी महात्मा फुले चौक ते माळजाई मंदिर गेट (मुधोजी क्लबकडील बाजू) या निश्चित ठिकाणीच स्टॉल उभारावेत, असे आवाहन करण्यात आले आहे.

या परिसरात गणेशमूर्ती खरेदीसाठी नागरिकांची मोठ्या प्रमाणात गर्दी होण्याची शक्यता आहे. त्यामुळे वाहतूक व्यवस्था आणि नागरिकांची सोय लक्षात घेऊन रविवार, १३ सप्टेंबर २०२६ रोजीचा आठवडी बाजार हा गिरवी नाका ते शासकीय विश्रामगृह ते बी.एस.एन.एल. ऑफिस रोड, कामगार वसाहत या परिसरात भरविण्यात येणार आहे.

सर्व भाजी विक्रेत्यांनी या बदलाची नोंद घेऊन फलटण नगरपरिषदेस सहकार्य करावे, असे आवाहन मुख्याधिकारी श्री. निखिल जाधव यांनी केले आहे.