फलटण : फलटण नगरपरिषदेच्या प्रारूप मतदार यादीवर हरकत दाखल करताना नागरिकांनी आपल्या अर्जासोबत स्थळ पाहणीसाठी सक्षम रहिवासी पुरावा जोडणे अत्यावश्यक असल्याचे आवाहन मुख्याधिकारी तथा प्रशासक निखिल जाधव यांनी प्रसिद्धीपत्रकाद्वारे केले आहे.नगरपरिषदेच्या निवडणुकीसाठीची प्रारूप मतदार यादी नुकतीच प्रसिद्ध करण्यात आली असून, सद्यस्थितीत नागरिकांना हरकती व सूचना दाखल करण्याची संधी देण्यात आली आहे. दाखल झालेल्या हरकतींवर नगरपालिका प्रशासनाकडून प्रत्यक्ष स्थळ पाहणी केली जाणार असून, त्यासाठी अर्जदाराने पुरेसा रहिवासी पुरावा सादर करणे आवश्यक आहे.
मुख्याधिकारी जाधव यांनी स्पष्ट केले की, फक्त रहिवासी पुरावा जोडलेल्या हरकतींवरच पुढील कार्यवाही केली जाणार असून, अपूर्ण अर्ज ग्राह्य धरले जाणार नाहीत.मतदार यादीवरील हरकती दाखल करण्याची अंतिम मुदत सोमवार, दि. १३ ऑक्टोबर असून, नागरिकांनी ही मुदत लक्षात घेऊन आवश्यक कागदपत्रांसह हरकती सादर कराव्यात, असेही आवाहन करण्यात आले आहे.
