महिन्याच्या पहिल्याच दिवशी महागाईचा झटका; कमर्शियल LPG सिलेंडर महाग

नवी दिल्ली : जून महिन्याच्या पहिल्याच दिवशी तेल विपणन कंपन्यांनी (OMCs) व्यावसायिक एलपीजी (LPG) गॅस सिलेंडरच्या दरात वाढ केली आहे. 19 किलोच्या कमर्शियल सिलेंडरच्या किमतीत 42 ते 54 रुपयांपर्यंत वाढ करण्यात आली असून, 14.2 किलोच्या घरगुती गॅस सिलेंडरचे दर मात्र स्थिर ठेवण्यात आले आहेत. त्यामुळे सर्वसामान्य ग्राहकांना काहीसा दिलासा मिळाला असला तरी हॉटेल, रेस्टॉरंट, केटरिंग आणि लघुउद्योगांच्या खर्चात वाढ होणार आहे.

नवीन दरानुसार दिल्लीमध्ये 19 किलोच्या व्यावसायिक एलपीजी सिलेंडरची किंमत 42 रुपयांनी वाढून ₹3,113.50 झाली आहे. कोलकात्यात ₹53.50 वाढीसह दर ₹3,255.50 वर पोहोचला आहे. मुंबईत 19 किलोच्या सिलेंडरची किंमत ₹3,067.50 झाली असून चेन्नईतही दरवाढ लागू करण्यात आली आहे.

दरम्यान, घरगुती वापराच्या 14.2 किलो एलपीजी सिलेंडरच्या किमतीत कोणताही बदल करण्यात आलेला नाही. मुंबईत घरगुती सिलेंडर ₹912.50, दिल्लीत ₹913, कोलकात्यात ₹939 आणि चेन्नईत ₹928.50 दराने उपलब्ध आहे. त्यामुळे घरगुती ग्राहकांवर सध्या तरी अतिरिक्त आर्थिक भार पडलेला नाही.

प्रमुख शहरांतील सध्याचे LPG दर

शहर घरगुती LPG (14.2 किलो) व्यावसायिक LPG (19 किलो)

मुंबई ₹912.50 ₹3,067.50
दिल्ली ₹913.00 ₹3,113.50
कोलकाता ₹939.00 ₹3,255.50
चेन्नई ₹928.50 ₹3,259.50 (अंदाजे)

विशेष म्हणजे, 2026 मध्ये व्यावसायिक सिलेंडरच्या दरात सलग अनेक वेळा वाढ करण्यात आली आहे. जागतिक बाजारातील कच्च्या तेलाच्या किमती, पश्चिम आशियातील तणाव, वाहतूक खर्च आणि इंधन सुरक्षेच्या कारणांमुळे ही वाढ होत असल्याचे सांगितले जात आहे. भारत मोठ्या प्रमाणावर एलपीजी आयातीवर अवलंबून असल्याने आंतरराष्ट्रीय बाजारातील चढ-उतारांचा थेट परिणाम देशांतर्गत दरांवर होत आहे.

या दरवाढीचा सर्वाधिक परिणाम हॉटेल्स, रेस्टॉरंट्स, बेकरी, केटरिंग व्यवसाय आणि लघुउद्योगांवर होणार आहे. उत्पादन खर्च वाढल्याने खाद्यपदार्थांच्या किंमती वाढण्याची शक्यता व्यक्त केली जात आहे. त्यामुळे अप्रत्यक्षपणे ग्राहकांनाही महागाईचा फटका बसू शकतो.