वडूज – कातरखटाव येथील काही कुटुंबे गेल्या अनेक वर्षांपासून पत्र्याचे शेड उभारून निवारा, पशुपालन व शेळीपालन व्यवसाय करत आहेत. मात्र गावातील संतोष दुबळे नामक व्यक्ती वारंवार या कुटुंबांना त्रास देत असल्याचा आरोप संबंधितांनी केला आहे.
भीमराव दुबळे यांच्या कुटुंबाचा आरोप आहे की, संतोष दुबळे हे “शेड व निवारा काढून टाकू” अशी धमकी देत असून, गावातील काही व्यक्तींना घेऊन संबंधित जागा अतिक्रमण असल्याचे सांगत दबाव टाकत आहेत. तसेच शिवीगाळ व धमकावल्याचाही आरोप करण्यात आला आहे.
या प्रकरणी वडूज पोलीस स्टेशनमध्ये तक्रार दाखल करण्यात आल्याचे संबंधित कुटुंबाने सांगितले. तक्रारीनंतरही “तुमच्याकडे बघून घेईल” अशा स्वरूपाच्या धमक्या दिल्या जात असल्याचा आरोप करण्यात आला आहे.
दरम्यान, संतोष दुबळे हे कोणतेही लोकनियुक्त प्रतिनिधी किंवा प्रशासकीय अधिकारी नसल्याचेही संबंधितांनी स्पष्ट केले आहे. तसेच गावातील दुसऱ्याच्या मालकीच्या जागेत साईबाबा मंदिर उभारल्याचाही आरोप करण्यात आला आहे.
या प्रकरणाची निष्पक्ष चौकशी करून संबंधितांवर योग्य कारवाई करावी, अशी मागणी पीडित कुटुंबांकडून करण्यात येत आहे.
