पडद्यावरचा नायक ठरला तामिळनाडूचा जननायक! थलपती विजय यांनी घेतली तामिळनाडूच्या मुख्यमंत्रिपदाची शपथ

चेन्नई – तामिळ चित्रपटसृष्टीतील सुपरस्टार आणि ‘तमिळगा वेत्री कळघम’ (TVK) पक्षाचे प्रमुख थलपती विजय यांनी रविवारी (दि. १० मे २०२६) तामिळनाडूच्या मुख्यमंत्रिपदाची शपथ घेत इतिहास रचला. चेन्नई येथील जवाहरलाल नेहरू स्टेडियममध्ये सकाळी १० वाजता भव्य शपथविधी सोहळा पार पडला. तामिळनाडूचे राज्यपाल राजेंद्र विश्वनाथ आर्लेकर यांनी विजय यांना पद आणि गोपनीयतेची शपथ दिली.

या सोहळ्यास हजारो समर्थकांसह विविध राजकीय नेते, चित्रपटसृष्टीतील मान्यवर आणि सामाजिक क्षेत्रातील दिग्गज उपस्थित होते. काँग्रेस नेते राहुल गांधी, अभिनेत्री तृषा कृष्णन तसेच विजय यांचे वडील आणि ज्येष्ठ दिग्दर्शक एस. ए. चंद्रशेखर यांनी विशेष उपस्थिती लावली.

मुख्यमंत्री विजय यांच्यासोबत TVK पक्षाच्या ९ नेत्यांनी मंत्री म्हणून शपथ घेतली. यामध्ये एन. आनंद (Bussy Anand), आधव अर्जुना आणि के. ए. सेनगोट्टयन यांचा समावेश आहे.

मुख्यमंत्रीपदाची शपथ घेतल्यानंतर विजय यांनी मंचावरच काही महत्त्वाच्या फाईल्सवर स्वाक्षऱ्या केल्या. यामध्ये गरीब नागरिकांसाठी मोफत वीज योजना, महिला संरक्षण दलाची स्थापना आणि प्रत्येक जिल्ह्यात अंमली पदार्थविरोधी विशेष पथक उभारण्याच्या निर्णयांचा समावेश आहे.

तामिळनाडू विधानसभेत बहुमतासाठी ११८ जागांची आवश्यकता असताना विजय यांच्या नेतृत्वाखालील आघाडीने १२० आमदारांचे समर्थन मिळवत स्पष्ट बहुमत मिळवले आहे. आघाडीमध्ये TVK चे १०७, काँग्रेसचे ५, CPI-CPM चे ४, VCK चे २ आणि IUML चे २ आमदार आहेत.

गेल्या सहा दशकांपासून तामिळनाडूच्या राजकारणात DMK आणि AIADMK या दोन पक्षांचे वर्चस्व होते. मात्र, विजय यांच्या नेतृत्वाखालील TVK पक्षाने तिसरा पर्याय म्हणून सत्ता स्थापन करत राज्याच्या राजकारणात मोठा बदल घडवून आणला आहे.

राज्यपालांनी मुख्यमंत्री विजय यांना १३ मेपूर्वी विधानसभेत बहुमत सिद्ध करण्याचे निर्देश दिले आहेत.

शपथविधीनंतर समर्थकांना संबोधित करताना विजय म्हणाले, “मी तुमचा मुलगा आणि भाऊ म्हणून तुमची सेवा करेन.” त्यांच्या या भावनिक भाषणाने उपस्थितांमध्ये उत्साहाचे वातावरण निर्माण झाले.